CEBU, Philippines - Si Superintendent Henry Biñas, hepe sa Talisay City Police Station mihulagway nga ang gihimo ni Joavan Fernandez nga pagbangga sa Innova Patrol Car buhat sa usa ka tawo nga dili normal ang panghuna-huna.
Dunay mga misulti nga ang sinagop ni Mayor Socrates Fernandez nagpakita nga walay respeto sa mga polis tungod sa giingong pagbangga niya sa Innova Patrol Car niadtong Domingo sa gabii diha sa Rabaya, Street, barangay San Roque.
“Kana dili na na normal ang pangutok, normally dili na normal nga dagan sa pangutok ug panghuna-huna sa usa ka tawo, ang tanan dunay kinutuban”, ni Biñas.
Si Biñas nanghinaot nga ang ubang mga kaso nga ilahang gipasaka batok kang Joavan moirog na kini ug unta masulod og balik sa prisohan ang sinagop sa mayor aron mahunong na kini sa iyahang pagpabadlong.
Kagahapon sa buntag gipadala sa hepe kang Inspector Diosdado Malazarte ang Innova Patrol Car ngadto sa Toyota Service Center ug gipa-estimate ang danyos niini.
Kagahapon sa hapon nahuman ang pag-estimate sa sakyanan diin mikabat ngadto sa P83,057.60 ang danyos sa nahisgutang sakyanan.
Kahinumduman nga maayong pagkalumping sa walang bahin sa sakyanan habig sa drayber tungod sa ka kusog sa pagbangga niini.
Human ma-estimate ang danyos giduso dayon sa kapolisan ang kasong malicious mischief ug direct assault batok kang Joavan diha sa Talisay City Prosecutors Office.
Kahinumduman nga ang mayor nagkanayon nga dunay problema ang Pajero nga gimaneho ni Joavan kay siya mismo nakasinati niini nga dili mokupot dayon ang preno.
Apan matud sa hepe nga ang korte na lang ang mohukom kung kinsay nagsulti sa tinuod ang iyaha bang mga sakop o ang mayor ba.
Matud usab ni Biñas nga posibleng dunay kasuko nila si Joavan tungod sa pagpatrolya nila diha sa Balay Alampoan ug sa pagpahigayon nila og check points dapit sa Vista Grande sa barangay Bulacao, Talisay diin ang maong lugar agianan paingon ngadto sa Balay Alampoan nga maoy estambayanan ni Joavan ug sa iyang mga barkada.
Gawas niini nasikop usab sa mga polis niadto ang usa sa bata-bata ni Joavan kinsa nagmaneho og motorsiklo nga walay plaka ug nanuok pa kini sa polis nga misita kaniya.
Human maduso ang kaso batok kang Joavan gilibkas na usab sa mga polis ang hot pursuit operation batok sa sinagop sa mayor.
Si Joavan pweding makapiyansa sa kasong iduso batok kaniya matud sa hepe ug kung makonbikto siya niini pwede siyang makapasaka og probation ug kung ugaling makapahimulos siya sa probation limitado na ang iyang panglihok tungod kay pweding malibkas ang probation ug serbisyohan gyud niya ang iyang sentensiya kung duna siya’y mahimong kalapasan sa gawas.
Si Biñas midugang nga iyahang i-follow-up ang menifestation kabahin sa compulsory rehabilitation batok kang Joavan. – BANAT NEWS