CEBU, Philippines - Nagtingkagol sa Talisay City detention cell ang usa ka 20-anyos nga lalaki kinsa giingong sakop sa Bloods gang human siya masakmite og pusil niadtong Lunes sa gabii didto sa Cebu South Memorial Garden, usa ka pribadong sam-ang nga nahimutang sa barangay Mohon, dakbayan sa Talisay.
Ang suspetsado mao si Jordan Centillas, taga barangay Lawaan I, sa nahisgutang siyudad kinsa naimbargohan og usa ka kalibre .38 nga dunay duha ka buhing bala nila ni PO1 Ariel Banal, PO1 Rogelio Gutang Jr. ug PO1 Jansen Cania.
Si Gutang nga nahinabi sa Banat News kagahapon mibutyag nga si Centillas giingong sakop sa Bloods ug duna kini nakalalis nga sakop sa Crips diha sa sulod sa gate sa nahisgutang sam-ang.
Matud ni Gutang nga si Centillas mipasangil mga gipakitaan siya og “dirty finger” sa sakop sa Crips hinungdan nga iyaha kining gikomprontase.
Dihang nagkomprontase ang suspetsado ug ang giingong sakop sa Crips giduol nila kini aron badlongon apan naglumba og panglakaw ang duha.
Usa ka drayber sa habal-habal ang misulti ngadto sa mga polis nga dunay dalang pusil si Centillas. Gigukod sa tulo ka polis si Centillas ug naaktohan nila kining nagbitbit ang walang kamot niini sa nahisgutang armas hinungdan nga ilahang giaresto.
Si Centillas mag-atubang og kasong illegal possession of firearm kalambigitan sa Comelec gun ban.
Ang Comelec gun ban malibkas karon pang Nobiyembre 10, 2010. – BANAT NEWS