CEBU, Philippines - Nakigtagbo si kanhi Vice Chairman Clarence Paul Oaminal sa Dangerorus Drugs Board (DDB) sa mga opisyal sa kapolisan sa Tacloban City ug ilang gihisgotan ang bahin sa paghatag og panginabuhi niadtong mga nakabangal sa mga cocaine nga naglutaw sa kadagatan sa Samar sa miaging tuig.
Ang gipakigtagboan ni Oaminal mao sila si Police Senior Supt. Vicente Loot, kinsa maoy mihulip kang Deputy Regional Director for Administration Police Chief Supt. Drusillo Bolofo kinsa miretiro niadtong Oktubre 24. Ang mga hintungdang nakabanganl sa maong mga illegal nga drugas kinsa pulos mga mananagat sa mga lalawigan sa Eastern Samar ug Northern Samar maoy tumong sa ilang mga sabotsabot.
Si Oaminal kinsa nagtuo nga ang maong lalawigan maoy sayon ug dali kaayong kaariyahan sa mga ilegal mga drugas sama sa cocaine kinahanglang bantayan pag-ayo sa kapolisan.
Nasayran nga sa miaging Disyembre 2009, gibanabana nga mikabat og duha ka metriko toniladas nga cocaine nga giariya sa kadagatan sa Samar mga lima ra ka gatos ang nabangalan sa mga mananagat nga naglutaw sa kadagatan sa Samar.
Apan luyo sa kadakong kalampusan nga mahimo sa mga mananagat sa maong higayon tagsa ra ka sakong bugas humay ang giprimyo kanila sa kagamhanan.
Matud pa ni Oaminal nga puwerte rang gamaya niining primyoha ug dili ikabugti sa nahimong kalampusan sa mga mananagat nga nakabangal sa maong mga kontrabando.
Mahinumdoman nga ang mga cocaine nga giariya sa dagat sa Samar sa wala hiilhing mga smuggler, nabangalan sa mga mananagat niadtong Disyembre 2009 apan niadto lang Abril 2010, nila madawat ang maong primyo nga tagsa ka sakong bugas, busa layo ra kaayo sa maayong kahulogan ang maong ganti, sumala ni Oaminal.
Ang usa sa nahunahunaan ni Oaminal nga angayang itunol sa kagamhanan ngadto sa maong mga mananagat mao ang paghatag kanila og mga bangka ug pukot nga ubanan og kuwarta para panggasolina.
Matud pa ni Oaminal nga ang ideya mugna ni Senador Vicente Sotto III, ang nailhang amahan sa PDEA.
Si Sotto maoy nangamahan sa katukoran sa maong ahensya ubos sa Republic Act of 2002.
Si Oaminal motunol sa iyang report ngadto kang Sotto kun buksan na ilang sesyon sa senado ug mosugyot nga motabang usab unta ang mga ahensya sama sa Department of Agriculture (DA), NEDA ug DSWD niadtong mga nakabangal sa cocaine.
Gitakda usab ni Oaminal ang paghatag og lektura bahin sa balaod sa drugas sa mga lalawigan sa rehiyon 8.
Niining umaabot nga Disyembre unahon niya ang pagpahigayon og lektura didto sa lalawighan sa Biliran. (BANATNEWS)