CEBU, Philippines - Hingpit nang gisibog sa bata-bata nga babaye ni Joavan Fernandez ang iyang gipasakang kasong grave threat batok sa sinagop sa mayor diha sa Talisay City Prosecutor’s Office niadtong milabay’ng adlaw.
Si Talisay City Prosecutor Marshal Rubia sa pakighinabi sa Banat News mibutyag nga mga alas 3:00 sa hapon niadtong Martes sa hapon miduso sa iyang affidavit of desistance diha sa iyang buhatan si Guillermina Barrido sa kasong grave threat nga iyang gipasaka batok kang Joavan.
Si Barrido giingong uban sa iyang bana ug sa igsuong si Brandon Barrido dihang mianha kini sa buhatan ni Rubia.
Si Rubia mibutyag nga iyaha untang ipabalik sa barangay ang maong kaso tungod kay wala man makasumitir si Barrido og certificate to file action apan karon resolbahon na nila kini tungod sa pag-atras niini.
Kahinumduman nga niadtong Oktubre 15, 2010 sa hapon atol sa pista sa dakbayan sa Talisay si Barrido Joavan nag-atubang diha sa barangay hall sa Bulacao ug diin nagkauliay sa maayo nilang kabubut-on. (BANAT)