CEBU, Philippines - Gipabakwit na ni Mayor Michael Rama ang kapin sa 80 ka mga lumulopyo sa sitio Tipolo, sa barangay Guadalupe gumikan sa peligro nga nahatag sa naliki nga riprap sa maong dapit.
Gimandoan na sa mayor ang Department of Public Works and Highways sa pagsusi na sa maong dapit samtang ang kontraktor nga WTG maoy moayo sa riprap.
Personal nga miduaw kagahapon si Rama sa maong lugar ug nangunay nga nanawagan sa mga residente sa maong lugar nga mas maayo nga moestar sa gihatag kanila nga evacuation site aron malikay sila sa peligro.
Nabantayan sa mayor nga dili maayo level sa riprap ug daghan na ang nangliki ug posibleng mosamot kini sa pagbunok sa uwan.
“Samtang sayo pa, kinahanglan gyud nako sila nga pabakwiton maong gimandoan gyud nako nga ang CCDC (Cebu City Coordinating Council) nga magbutang og mga sign boards aron mailhan nga danger zone ang lugar .Dili ta magpaabot nga duna na'y dautang mahitabo, kinahanglan nga andam gyud ta sa mga kalamidad,” nagkanayon ang mayor.
Nagkanayon ang usa sa mga residente sa maong dapit nga si Jacinto Maambong nga iyang nabantayan sa miaging semana nga pipila ka parte sa bungbong sa iyang balay ang miliki ug nagtuo siyang naapektohan kini sa naguba nga riprap.
Sa pagkakaron, gipabutangan sa mayor og upat ka pulis ang maong area aron dili kini masudlan sa mga tawo samtang dili una paagian og sakyanan ang Guadalupe-Opra Bridge. (BANAT)