CEBU, Philippines - Pasakaan og kasong kalapasan sa Comelec gun ban ug uban pa ang polis nga nalambigit sa nahitabong engkwentro tali sa duha ka dumadapig sa duha ka kandidato sa pagka-barangay kapitan sa Punta Engaño sa dakbayan sa Lapulapu niadtong milabay’ng Lunes sa kaadlawon.
Si Sr. Supt. Ramon Rafael, hepe sa Criminal Investigation and Detection Group (CIDG)-7 kinsa maoy pangulo sa giumol nga task force pagsusi sa maong pinusilay nagkanayon nga ilang kasohan si SPO1 Diogines Carillo. Lakip sa ipasakang kaso mao ang illegal possession of firearms and ammunition ug ila usab gisusi ang partisipasyon ni Carillo sa nahitabong pinusilay nga miresulta sa kamatayon sa usa ug pagkaangol sa duha ka barangay tanod. Matud pang Rafael nga gawas kang Carillo hasta ang mga nalambigit nga mga tanod apilon unya sa ilang kasuhan kun makita sa imbestigasyon nga nakalapas sila sa salaod.
Ang CIDG-7 ug ang task force nagtigom na og mga ebidensya ug mga pamahayag sa mga saksi ug sa mismo unyang mga nalambigit alang sa pagtuon kun si kinsay ilang makasuhan.
Apan si Carrillo sa iyang bahin nga nahinabi sa mga tigbalita kagahapon sa buntag sa CIDG-7 miingon nga andam siyang moatubang sa administrative investigation nga himuon batok kaniya. Matud niya nga duna siya’y rason nganong naabot siya sa maong lugar nga iyang gipangangkon nga justifiable tungod kay matud pa niya nga nananghid siya sa iyang mga kauban nga duty niadtong tungora sa Liloan Police Station nga mag-ilis niadtong higayona bisan tuod kun nag-duty siya niadtong tungora. Si Carrillo boluntaryong mitahan sa iyang kaugalingon sa CIDG-7 niadtong Lunes sa buntag nangangkong igo lang siya midepensa sa iyang kaugalingon dihang giunhan siya pagpusil niadtong higayona.
Si Sr. Supt. Erson Digal, pangulo sa kapulisan sa probinsya mimando na sa Provincial Investigation and Detective Management Branch (PIDMB) paghimo og administrative investigation batok kang Carrillo.
Girelibohan usab si Carrillo ug ipabalhin sa provincial headquarters aron sa ingon niini dali rang mapatawag ang maong pulis kun kasugdan na unya ang imbestigasyon.
Si SPO2 Rolito Jumao-as sa Crime Against Persons Desk sa kapulisan sa Lapulapu kinsa usa sa miimbestigar sa maong kaso miangkong wala pa gyud silay kongkretong matumbok kinsay sad-an sa duha ka habig.
Matud pa niya sa pagkakaron, ang tanang nalambigit pulos gikunsiderar nga biktima ug ingon man suspek sa maong krimen.
Kahinumduman nga ang mga supporters nila ni Lourdes Ibag ug Angel Rodriguez sa posisyon pagka barangay kapitan sa Punta Engaño nagkaengkwentro sa sitio Lupa sa maong barangay ug mikalas sa kinabuhi ni Demetrio Sumalpong ang driver ni Rodriguez.
Samtang samaran usab ang mga tanod ni incumbent Kapitan Ibag nga sila si Remegio Bantilo ug Alejandro Veloria human mibalos si SPO1 Carillo nga kauban ni Sumalpong niadtong higayona. - Rey Pasaporte ug Romeo Limpangog (BANAT NEWS)