CEBU, Philippines - Ang pagsulbad sa suliran bahin sa mga kanal sa kabarangayan sa dakbayan sa Lapulapu nahilakip na sa giaprobahan nga annual investment plan nga gihan-ay ni Mayor Paz Radaza.
Ang gahin sa annual investment plan nga nagkantidad og P87 milyones giaprobahan sa konseho sa dakbayan sa miaging adlaw.
Nalakip sa maong gahin ang P10 milyones nga alang sa drainage program sa kagamhanan sa pipila ka mga barangay sa maong dakbayan.
Si Konsehal Efren Herrera nga nahinabi sa Banat News miingon nga pipila sa mga barangay nga problemado kaayo og kanal mao ang barangay Basak, Gun-ob, Pusok, Pajo ug Poblacion.
Matud pa ni Konsehal Herrera nga daghan pang mga barangay sa dakbayan nagproblema sa ilang drainage system nga gihatagan og pagtagad sa kagamhanan karon. – BANAT NEWS