CEBU, Philippines - Gipasanginlang namusil og sibilyan tungod sa kahubog ang hepe sa Investigation and Detective Management Branch (IDMB) sa Cebu City Police Office (CCPO) nga si Chief Insp. George Ylanan niadtong miaging gabii diha sa Salvador Extention sa barangay Labangon ning dakbayan. Si Antonio Maraveles nga taga Salvador extention nalandig sa tambalanan human naigo sa splinter sa wala pa matinong kalibre sa armas.
Sigun sa report sa Buena Mano sa GMA-7 kagahapon sa buntag si Maraveles miingon nga wala siya namasangil sa tawo nga nipusil kaniya.
Apan usa ka saksi sa maong hitabo mitumbok kang Ylanan nga hubog ug maoy nagpasalba og armas.
Matud sa saksi nga nakaila kaayo siya kang Ylanan sanglit ang maong opisyal “Opaw.”
Si Ylanan sa iyang bahin nga nahinabi sa mga tigbalita hugtanong mihimakak sa pasangil nga nagpasalba siya sa iyang armas gumikan sa kahubog.
Matud niya nga wala siya makaila sa tawo nga namasangil kaniya ug gani kagahapon sa buntag gitawgan nalang siya sa mga sakop sa Punta Princesa Police station kabahin sa maong alegasyon sanglit sayo siyang natulog nianang gabii.
Gihagit ni Ylanan ang complainant nga mopatim-aw mokuyog kaniya aron mopaubos siya sa paraffin test.
“I can submit myself to paraffin test unya kuyog mi sa complainant kay kun ma-negative, gusto ko nga nay accountable person for maligning my name,” matud pang Ylanan sa mga tigbalita. Mipasabot kini nga sukad sa tulo ka operasyon nga iyang giagian lima ka bulan na ang nakalabay gidid-an na siya nga makainom og bino sa mga doktor. – BANAT NEWS