CEBU, Philippines - Gitulis sa tulo ka armadong mga lalaking pulos nagsul-ob og uniporme sa militar ang usa ka gasoline station sa barangay Abucayan sa lungsod sa Balamban niadtong Martes sa alas 5:30 sa buntag.
Ang gitulis mao ang Lucky-9 Shell Gas Station nga gipanag-iya sa usa ka Rey Bryan Igot Monsanto, taga lungsod sa Balamban.
Matod ni PO3 Celso Diaz sa Balamban Police dihang nahinabi sa Banat News, ang tag-iya maoy nangunay pagdumala sa cashier’s booth dihang kalit miabot ang duha ka motorsiklo diin sakay ang tulo ka mga nagsul-ob og uniporme sa militar.
Nagdaling misulod sa cashier’s booth ang usa niini dayong duol ug midiretso og tion sa armas ngadto kang Monsanto ug mideklarar og tulis samtang ang duha ka kauban niini maoy nagsilbing lookout sa gawas nga bahin sanglit wala may gwardiya ang maong gas station.
Nagdumili unta paghatag sa halin ang biktima apan giduslak ang luyong bahin sa hawak niini sa armas nga gigunitan sa tulisan hinungdan nga napugos og abli sa vault nga gisudlan sa halin nga P3,000.
Human niini daling nanakay og balik sa ilang motorsiklo ang tulo. – BANAT NEWS