CEBU, Philippines - Gumikan sa sunod-sunod nga kawat sa metro sa tubig sa dakbayan sa Lapulapu, gipakigtagboan ni Lapulapu City Mayor Paz Radaza ang mga tag-iya ug junkshops aron pahimangnoan nga gidili kini sa balaod.
Matud pa ni PO3 Elmer Canillo sa Crime Against Property (CAP) desk sa kapolisan sa Lapulapu nga maayo ang lakang nga gihimo ni Mayor Radaza sa pagpakigtabo ngadto sa mga nanag-iya og junkshop. Base sa talaan sa CAP desk nasuta nga sa bulan sa Septiyembre sobra sa 50 ka mga residente ang nabiktima sa pagpangawat sa ilang metrohan sa tubig.Atol sa pakigtagbo ni Radaza sa mga junkshop owners kini mibahad nga dili magpanuko sa pagpasaka og kaso ug pagpabilanggo kanila kun masakpang namalit sila og metrohan sa tubig.Base sa ilang talaan nasuta nga kusog ang kawat sa mga metro sa mga barangay Marigondon, Maribago, Agus ug Basak. Ang metrohan sa tubig ginama sa bronse nga maoy ipatimbang diha sa mga junkshops sa mga kawatan tungod sa kamahal sa presyo niini gikan sa P200 pataas. – BANAT NEWS