CEBU, Philippines - Tulo ang naangol apil na ang drayber ug duha ka helper niini human aksidenteng nalimbuwad ang gimaneho niining Prime Mover nga puno sa karga sa mga basiyo sa beer nga nawad-an sa preno ug midaro sa usa ka panimalay diha sa barangay Luka sa lungsod sa Oslob alas 6:00 sa gabii niadtong Domingo.
Ang Prime Mover nga dunay plakang GUF-363 gimaneho sa usa ka Roger Harap, 45, molupyo sa barangay Guadalupe siyudad sa Sugbo, ug ang helper niini nga si Demirags Harap, 21, nga iyaha ra usab kabanay ug ang maintenance mechanic niini nga si Tony Canoy, 33, taga lungsod sa Pinamungahan.
Ang helper ug mekaniko pulos pa giatiman sa mga mananambal samtang ang drayber natanggong sa karsel sa kapolisan human matino nga luwas na kini sa peligro.
Matud pa ni PO2 Albert Yray sa Oslob Police dihang nahinabi sa Banat News ang Prime Mover gikan sa Bato, Samboan ug paingon sa siyudad sa Sugbo ug pag-abot sa kurbadahon ug dulhugon nga bahin sa karsada sa maong lugar kalit lang kining nawad-an sa preno.
Tungod niini nawad-an og kontrol ang drayber sa trak hinungdan nga mibangga kini sa poste sa kuryente ngadto na sa puthaw nga railings ug midaro pa gyud sa usa ka panimalay daplin sa karsada.
Ang tagtungod sa balay nga usa ka babaye swerteng wala madat-ugi sa maong trak ug luwas nga nakagawas sa iyang balay.
Ang mga naangol daling gihatud sa Oslob District Hospital. Sa paghimo ning balita wala pa makabanabana ang kapulisan sa kinatibuk-ang danyos sa maong aksidente. – BANAT NEWS