CEBU, Philippines - Nabulit sa samad pinusilan ang kalawasan sa 26-anyos nga lalaki human kini gi-shotgun sa igsuon sa iyang kapuyo dihang nalupig niya sa sinukmagay diha sa sitio Buriring sa barangay Abucayan sa lungsod sa Balamban niadtong Domingo sa alas 6:30 sa gabii.
Ang biktima mao si Oliver Lliones, 26, molupyo sa nahisgutang lugar samtang ang suspek mao ang manghod sa iyang kapuyo nga si Jespel Tagalog, 30, nagpuyo gihapon sa maong lugar.
Matud ni PO3 Celso Diaz sa Balamban Police Station dihang nahinabi sa Banat News subay sa imbestigasyon nagkalalis ang biktima ug suspek human gipasanginlan ang biktima nga nanguha og kahoy sa bungbong sa pinuy-anan sa suspek aron isugnod sa linung-ag niini.
Kini misangko sa ilang sinukmagay apan nalupig sa biktima ang suspek ug midagan pahilayo ang naulahi.
Apan dihang nanglakaw ang biktima kauban sa kapuyo niini nga igsuon sa suspek wala sila makabantay nga gisundan sila sa suspek ug pag-abot sa mingaw nga lugar gipusil sa suspek ang biktima gamit ang improvised shotgun kon pugakhang.
Nabulit sa samad pinusilan ang biktima ug daling nangayo og panabang ang kapuyo niini dayun gihatud sa Balamban District Hospital apan gideklarar sa mga mananambal nga dead on arrival.
Samtang ang suspek daling nakasibat pahilayo ug wala na maabti sa mirespondeng mga polis ug sa paghimo ning balita padayon pa ang man hunt operation batok niini. (BANATNEWS)