CEBU, Philippines - Patay ang usa ka drayber sa habal- habal human kini dunggaba atubangan sa merkado sa barangay Cogon West sa lungsod sa Carmen niadtong Martes sa gabii.
Ang biktima mao si Joan Monleon Capuyan, 21, ulitawo, nga taga Sitio Tagaytay, barangay Lamak Korte, samtang ang duha ka mga suspek mao si Rommel Bermijo Cruz, 26 anyos, ulitawo, nga taga barangay Canpitay, sa maong lungsod ug ang silingan niini nga ginganlan og Otik Basan.
Si SPO2 Renerio Masocol sa Carmen Police Station mibutyag sa Banat News nga ang biktima uban sa iyang ig-agaw nga si Jonnel Bonso Capuyan gikan nga namista sa barangay Guinsay siyudad sa Danao.
Sa ilang pagpauli, namahuway sila sa atubangan sa merkado sa Carmen apan milakaw ang biktima kay mipalit og mineral water samtang si Jonnel nagpabilin sa motorsiklo.
Apan pag-agi sa biktima sa grupo sa nanag-inom, ang duha ka suspetsado misunod kaniya ug dayon si Bermijo maoy mihansak og kutsilyo sa bukobuko sa biktima.
Samtang si Jonnel nga didto sa motorsiklo mao usab unta ang rumbo nga lubaon ni Otik, maayo nalang kay nakabantay ang nahauna ug mikaratel kini og dagan.
Si Joan nakadagan pa apan nahagba ra kini sa unahan ug nabugtoan og gininhawa, samtang gisakiyo pa gyud sa mga suspetsado ang iyang pitaka nga may sulod nga P1,500, ug una manibat gibunalbunalan pa ang motorsiklo sa biktima.
Padayon pang gipangita sa kapolisan ang mga suspetsado. – BANAT NEWS