CEBU, Philippines - Nadakpan sa gipahigayong buy bust operation sa kapulisan sa Toledo ang usa ka babaye nga giingong taud-taod nang gipanid-an nga tigbaligya og ginadiling drugas sa dakbayan sa Toledo.
Ang nasikop sa buy bust operation sa kapulisan diha gyud mismo sa gate sa tunghaan sa Luray-1 Elementary School sa Toledo niadtong Miyerkules sa alas-10 sa buntag mao si Corazon Abasa, 41 , taga sitio Kabulihan barangay Ilihan Toledo.
Matud pa ni SPO3 Carmelito Hornales sa Toledo City Police dihang nahinabi sa Banat News, ang suspek taud-taod na nilang gipanid-an human sila makadawat og impormasyong namaligya kini og shabu sa maong dapit.
Usa ka polis ang nagsilbing poseur buyer maoy mipalit sa suspek og duha ka paketeng shabu ug dihang gidawat niini ang marked money gidakop kini dayon.
An suspek nagtingkagol na karun sa karsel human pormal nang gipasakaan og kaso sa korte kagahapong adlawa. – BANAT NEWS