CEBU, Philippines - Usa ka 22-anyos nga lalaki nga gipasanginlang sakop sa “Laglag Barya” gang ang nadakpan sa iyang biktima atol sa ilang pag-ikyas kagahapon diha sa barangay Basak-San Nicolas ning dakbayan. Si PO3 Diosdado Andales miila sa dinakpan nga si Jason Alvarez, 22, temporaryong nagpuyo sa barangay Tabunok dakbayan sa Talisay apan lumad nga taga Ozamis City.
Usa ka Evans Vergara, 62, nga taga dalan Tabada sa barangay Mambaling ang nakadakop sa suspek human niya makit-i ang iyang pitaka sa lingkuranan sa suspek nga wala nay sulod.
Matud pa ni Andales, luwan sa pasaheroang jeep padulong sa Pardo si Vergara ug nakasakay ang suspek kauban ang laing duha ka lalaking nakaikyas.
Sumala pa usa sa tulo ang mituyo og hagbong og sensilyo apan wala niya kini tabangi pagpunit sa salog ug namatikdan nalang niyang nagpunay og dutdot kaniya ang katupad nga pasahero.
Pag-abot sa Basak-San Nicolas nagdali pagkanaog ang tulo apan nakit-an ni Vergara ang iyang pitaka sa gilingkuran sa mga nanganaog ug sa iyang paghiling wala na ang sulod nga P500.
Dali niya kining gisundan ug nakuptan si Alvarez ug nagpatabang sa mga tawo hinungdan sa pagkasikop niini. (BANATNEWS)