CEBU, Philippines - Higpit nga gibantayan sa kapolisan sa dakbayan sa Mandaue ang mga pension house gumikan sa pagkasikop sa mga gipasanginlang grupo sa mga Salisi gang nga nangadakpan sa mga sakop sa Cebu City Police Office niadtong milabay’ng semana. Si Insp. Rommel Morpos, hepe sa Theft and Robbery Section sa kapolisan sa maong dakbayan miingon nga gumikan sa pagkaaresto sa grupo ilaha karong panid-an ang mga mangabang sa mga pension houses sa dakbayan.
Niadtong milabay’ng semana, nasipong ang unom ka mga sakop sa CCPO ang grupo sa Salisi gang sulod sa usa ka pension house sa barangay Cabangcalan ug pagkarekober sa daghang mga bag ug uban pang ebidensya.
Dugang pa niini mao ang report nga nadawat sa kapolisan nga adunay grupo sa mga dautang elemento ang gipaabot nga mohugpa dinhi sa Sugbo nunot sa nagsingabot nga kapaskuhan.
Buot pakigkitaan ni Morpos ang mga tag-iya sa maong mga establisamento aron agnihon sila sa pagtaho gilayon sa ilang buhatan kun makamatikod og mga tawo nga katingalahan ang kalihokan. Si Morpos miila sa mga nadakpan nga grupo sa Salisi gang nga ilang nadakpan nga mao sila si Shiela Mae Coton, 19, Arlene Cortes, 38 nga taga lalawigan sa Bohol, Elaine Buenaventura, 34, Jomer Aloria, 25, Jonathan Pitao ug usa ka 12-anyos. (BANATNEWS)