CEBU, Philippines - Gidayeg ni Kongresista Tomas Osmeña sa habagatang distrito sa dakbayan sa Sugbo si Presidente Benigno Aquino III tungod kay wala pakyasa niini ang iyang gihangyo nga ipahusay ang kaso sa 93-1.
Ang maong pagdayeg gipalanog ni Osmeña atol sa usa ka forum nga gitambongan sa nagkalainlaing lider sa mga organisasyon sa urban poor ning dakbayan didto sa Cebu Technical School niadtong Lunes sa buntag.
Matud pa ni Osmeña nga labaw niyang gipasalamatan si Presidente Aquino tungod sa pagpadala niini kang Kalihim Jesse Robredo sa Department of Interior and Local Government (DILG) nga gitahasan sa paghusay sa maong problema.
Gisaysay ni Osmeña nga niadtong pagduaw ni Presidente Aquino dinhi sa dakbayan sa miaging buwan, wala siyay laing gihangyo sa Pamuno nasud gawas sa suliran sa 93-1.
Matud pa ni Osmeña nga nalipay kaayo siya niadtong higayona kay misaad ang Pamuno nasud nga himoan niya og lakang ang maong problema.
Karong gipadala niini si Robredo aron maoy mohusay sa maong suliran, labing misamot ang kalipay sa kanhi mayor sa dakbayan sa Sugbo, sanglit alang kaniya nasuhito na kaayo siya sa abilidad ni Robredo tungod kay suod kaayo sila sukad pa sa tuig 1988 dihang nagdungan sila pagkapili nga mayor, siya si Osmeña dinhi sa dakbayan sa Sugbo, samtang si Robredo didto sa dakbayan sa Naga.
Alang kang Osmeña nga dako kaayo siya og pagsalig kang Robredo kinsa matud niya, sa tanang miyembro sa kabinete ni Presidente Aquino, si Robredo ra maoy labi niyang gisaligan.
Busa giawhag ni Osmeña ang tanan nga kinahanglang suportahan niini si Robredo sa tanang sistema nga sagupon niini ilabi na ang kasulbaran sa suliran sa 93-1. (BANATNEWS)