CEBU, Philippines - Usa ka sakop sa Barangay Intelligence Network (BIN) sa Cebu City Police Office (CCPO) napusilan sa usa ka sakop sa Alpha Kappa Rho (Akrho) fraternity human nailog ang dala nga armas sa biktima sa miaging gabii pasado alas 10 diha sa sitio Sto Niño, barangay Quiot Pardo ning siyudad.
Ang mga sakop sa Homicide Section miila sa biktima nga mao si Geroncio Morales, residente sa maong lugar.
Nailhan hinuon sa kapolisan apan wala pa nila madakpi ang sakop sa Akrho nga nakapusil nga si Arnel Yburan, 20, ulitawo ug residente sa barangay Buhisan, ning siyudad.
Si PO3 Geoffrey Gutual sa Homicide Section nga nahinabi sa Banat News mibutyag nga milabay ang suspek sa nahimutangan sa biktima hinungdan nga gisita kini sanglit gidudahang armado ang suspek.
Matud ni Gutual nga mibunot sa .45 nga kalibre sa armas ang biktima apan mimando ang suspek nga ipabutang ang armas kay magsinukmagay lang sila hangtud nga giilog sa suspek ang armas ug didto gipusil ang biktima diha sa dughan.
Ang biktima daling gihatod sa Cebu City Medical Center sa mga tawo sa dapit samtang ang suspek misibat palayo sa lugar.
Apan matud pa ni Gutual narekober sa mga tanod sa dapit ang armas nga gigamit pagpusil sa suspek ngadto sa biktima human gibilin ni Gerry Gorilo nga apohan sa kapuyo sa suspetsado.
Nakuha sa kapolisan sa crime scene ang duha ka kabhang sa .45 nga kalibre sa armas.
Matud ni Gutual ang armas gipanag-iya gyud sa biktima ug ila kining ipailawom sa ballistic examination sa PNP crime laboratory. - Rey B. Pasaporte (BANAT NEWS)