CEBU, Philippines - Ang hunta probinsyal mihangyo sa Department of Education (DepEd) Regional Office nga mohatag og higayon sa mga estudyante sa mga kolehiyo sa Mandaue, Cordova, ug Consolacion nga anha ra mag-practice teaching sa mga tulonghaan sulod sa ilang hurisdiksyon.
Si Board Member Thadeo Ouano sa ikaunom nga distrito sa Sugbo mihangyo sa DepEd nga tagdon unta ang maong tinguha tungod kay ang edukasyon mao may nag-una sa hunahuna sa mga opisyal sa kagamhanan sa lalawigan sa Sugbo.
Ang pag-ugmad sa makiangayon nga kahigayonan sa pagtungha sa kabataan maoy labing gipangandoy sa kagamhanan sa lalawigan.
Dugang pa ni Ouano nga mas sayon nalang unya sa mga estudyante sa kursong Education kun adto na lang sila mag-practice teaching sa mga kolehiyo sa ilang tagsatagsa ka lugar.
Ang practice teaching maoy kabahin sa mga aktibidad sa usa ka estudyante nga hapit nang mograduwar sa iyang kurso nga edukasyon.
Kun kaaprobahan ang resolusyon kalabot niini hatagan og kopya sa hunta probinsyal ang Regional Office sa DepEd ug mga division office niini sa Mandaue, Consolacion ug Cordova.
Kini aron hisayran sa mga kadagkoan sa matag local nga kolehiyo ug unibersidad nga ang mga estudyanteng angay mag-practice teaching, anha na patudloa sa local nga kolehiyo ug unibersidad diin sila nagpuyo. - Rome T. Limpangog (BANAT NEWS)