CEBU, Philippines - Usa ka sakop sa dakong sindikato sa ginadiling drugas sa Central Visayas ang nadakpan sa buy-bust operation sa miaging gabii sa mga sakop sa Philippine Drug Enforcement Agency (PDEA-7) sa dalan A. Lopez, barangay Calamba ning siyudad.
Si PDEA-7 acting director Adrian Alvarino nagkanayon nga kapin na sa tulo ka tuig nga naglihok sa Central Visayas ang grupo ni Donald Soco, 34, ulitawo ug Antonia Lisondra, 24, pulos taga A. Lopez.
Ang duha nakuhaan og gibanabanang 900 gramos nga shabu nga mokabat og P9 milyones. Giisip sila sa PDEA nga level one drug pusher.
Nakuhang ebidensya mao ang duha ka dagkong putos nga shabu nga 100 grams, duha ka 50 gramos, 15 ka putos nga 25 gramos ug 33 ka putos nga lima ka gramos, duha ka cellphone ug usa ka kalibre .380 pistola, magasin nga may pito ka buhing bala ug laing 16 ka buhing bala nga nakuha gikan ni Soco.
Lakip sa nakuha mao ang usa ka listahan sa drugas nga dunay mga inisyal nga ngalan sa mga pusher ug kini maoy ilang sutaon pag-ayo si kinsa kining personalidad nga nasulat sa gamay’ng listahan.
Matud pa ni Alvarino nga duha ka tag P500 nga marked money diin ang ilawom niini budol money maoy gigamit sa ilang poseur buyer nga gipalit kang Soco bugti sa usa ka putos nga shabu nga singko gramos.
Ang transaksiyon gihimo gawas sa balay ni Soco ug sa dihang natunol na ang shabu, gisulod ang balay ug didto nakit-an ang ubang shabu nga gisulod sa dakong plastik nga alang unta i-deliver sa ilang mga runner paingon sa lainlaing lugar sa Central Visayas, lakip na sa probinsya sa Sugbo. Matud ni Alvarino nga naabtan nila si Lisondra sa sulod sa balay nga wala makadagan samtang ang ubang mga tawo nag-iyahay og pangambak sa koral sa balay.
Si Soco giingong adunay koneksyon gikan sa Masbate ug kaulohan. Sa wala pa madakpi si Soco ug Lisondra, laing nadakpan sa buy-bust operation sa PDEA-7 sa Soong, Lapulapu pagka-alas 5 sa hapon mao si Lorylyn Maglangit Gonzales alias Cenoy, 28, dalaga nga nakuhaan og 35 ka pakete sa shabu human paliti og usa ka pakete nga nagkantidad og P200. (BANATNEWS)