CEBU, Philippines - Kritikal ang kahimtang sa usa ka lalaki human mapusili sa usa ka kagawad nga kanhi kasosyo sa negosyo sa Upper Lingegon, lungsod sa Argao niadtong Lunes sa alas 7:30 sa gabii.
Nakaangkon og usa ka samad pinusilan sa kilid ug duha sa tiyan si Norwam Dumillo, molupyo sa nahisgutang lugar. Ang suspek mao si Kagawad Gregorio Igos, 53. Si Dumillo ug Igos kanhi suod nga managhigala ug sosyo sa negosyo sa maong lugar.
Matud ni PO2 Rodrigo Teo sa Argao Police Station nga ang biktima duna kini gibisita sa maong lugar ug sa dihang paingon nang mosakay sa motorsiklo, miabot ang suspek ug gipusil makatulo ka higayon ang biktima. Ang suspek daling misibat, apan nasikop sa pagkahapon atol sa paggukod sa kapolisan.
Gipaubos sa paraffin test si Igos tungod kay mihimakak kini nga siya’y nagpusil sa iyang kasosyo. - BANAT NEWS