CEBU, Philippines - Nahanaw ang P61,000 nga salapi ug mga mahalong alahas sa usa ka senior citizen nga babaye human ilara sa bodol gang didto sa dalan A. del Rosario ,sa barangay Centro, dakbayan sa Mandaue sa miaging hapon.
Ang biktima mao si Jesusa Benabaye Lopez, 67, minyo, nga taga barangay Maguikay sa maong dakbayan.
Si PO3 Herbert Pelayo sa kapolisan sa Presinto 1 sa Mandaue City Police Office (MCPO) nga nahinabi sa Banat News miingon nga nagpaabot na unta og sakyanan ang biktima pauli sa ilang balay , gikan nga nag-withdraw og kuwarta sa bangko, apan miduol ang usa ka lalaki nga nagpailang Roy Valera uban ang usa ka babayeng Insekon nga nagpailang Helen Go.
Ang duha kinsa miingon nga dili sila taga Cebu ug gustong mopalit og fire extinguisher, nangutana sa biktima kun asa sila kapalit niini.
Unya taudtaod may lain na usab nga lalaki miduol kanila kinsa miingon nga nakatultol siya sa palitanan og fire extinguisher ug mitanyag nga siya’y mogiya sa duha ngadto sa tindahan.
Ang nagpailang si Valera ug Go nananghid sa biktima nga mokuyog sila sa maong lalaki ug ang ilang bag nga gisudlan sa ilang P200,000 ibilin nila sa biktima.
Unya aron konuhay makasalig sila, ila usab nga gihangyo ang biktima nga idungan usab pagsulod ang bag ug alahas niini sa usa ka dakong bag nga may kandado diin didto ang ilang gamay nga bag nga gisudlan sa P200,000, ug ilang gibilin sa biktima, dayong panlakaw.
Apan dihang misawop na ang adlaw ug wala na mahibalik ang nagpailang Valera ug Go ug kadtong migiya kanila, nabalaka na ang biktima ug gipugos pag-abli ang bag nga kinandadohan.
Nakurat nalang kini ug nakatibi, dihang paghiling niya wala didto ang iyang bag nga gisudlan sa cash nga P61,000 ug karaang mga alahas.
Apan labaw sa tanan nga nakapasamot sa kaguol sa biktima mao nga paghiling niya sa bag nga gibilin ni Valera ug Go, pulos ginunting nga newspaper ang sulod.
Misumbong ang biktima sa kapolisan nga nagtibi sa kasubo ug gipangita dayon sa kapolisan ang mga mangingilad. – BANAT NEWS