CEBU, Philippines - Duha ka mga lalaki ang nangaangol sa managlahing pagpanunggab ug pagpanigbas niadtong Sabado ning dakbayan.
Alas-10 pasado sa buntag dihang usa ka John Rey Alferez, nga taga Villa Concepcion sa barangay Kinasang-an ning dakbayan ang gitigbas sa iyang kainom nga nailhan lang sa pangalan nga Lando.
Matud pa sa kapolisan kauban sa duha ang ilang mga higala nga nag-inom niadtong tungura apan kalit silang nagkabikil ug milakaw ang suspek apan mibalik nga nagdala na og bolo. Ang biktima wala makabantay sa pagbalik sa suspek nakaangkon og samad tinigbasan sa iyang dughan ug likod ug pagkahuman gibiyaan sa suspek kinsa daling miikyas. Si Alferez gidala sa Cebu City Medical Center. Sa laing bahin, nianang pagka alas-11 sa gabii usa ka Juster Lingao-lingao ang gidunggab diha sa dalan V. Rama sa barangay Calamba samtang kini naglakaw gikan nag-disko.
Usa ka Eric Dean Aniqua, 19, maoy gitumbok nga miluba sa buko-buko sa biktima human kini masikop sa grupo nila ni SPO1 Roger Sering sa San Nicolas Police Station. Gisusi pa sa kapolisan kun unsay motibo sa pagpanunggab. (BANATNEWS)