CEBU, Philippines - Aksidenting napusilan sa usa ka bana ang iyang asawa human sa ilang panaglalis sa ilang pinuy-anan sa barangay Pundol, lungsod sa Balamban niadtong Huwebes sa alas 8:30 sa gabii.
Ang aksidenteng naigo sa bala mao si Anita Legaspino Playda, 42, molupyo sa nahisgutang lugar. Ang iyang bana mao si Dionisio Playda, 44.
Matud ni PO3 Celso Diaz, desk officer sa Balamban Police Station sa dihang nahinabi sa Banat News nga sa wala pa ang hitabo, nagkalalis ang magtiayong Playda kabahin sa usa sa ilang anak nga kanunay nga dugay’ng mopauli.
Human sa ilang panaglalis, gihulbot ni Dionisio ang iyang pistola nga kalibre .45 sa hawakan ug dayon gibutang sa ilang lamesa.
Apan wala damha kalit lang kining mibuto ug maayong pagkaigo sa biktima sa iyang tuong bukton. Gitataw ni Dionisio nga wala tuyoa ang pagpabuto sa armas.
Daling gidala sa Balamban District Hospital ang biktima samtang ang bana mitahan sa iyang kaugalingon kang Sgt. Ranilo Benisisto sa 78 Infantry Battalion nga anaa mag-detachment sa barangay Nangka, Balamban ug ang sundalo na ang mi-turnover kaniya ngadto sa kapolisan.
Ang suspek gitanggong sa karsel samtang gipaabot pa ang desisyon sa asawa kun mopasaka ba og kaso. – BANAT NEWS