CEBU, Philippines - Si Provincial board member Agnes Magpale mireklamo tungod kay wala pa gihapon makagawas gikan sa buhatan ni Vice Governor Gregorio Sanchez ang resolusyon nga naghatag og pagtugot kang Governor Gwen Garcia nga makapirma og Memorandum of Agreement (MOA) tali sa National Food Authority (NFA)-7 aron makautang og 10 mil ka sakong bugas aron iandam sa mabiktima sa kalamidad sa lalawigan.
Kini bisan pa sa kadugay nang giaprobahan sa kinabag-ang mga miyembro sa hunta probinsiyal ang maong resolusyon. Suma pa ni Magpale ang kinabag-ang mayor sa kalungsoran miadto gyud sa Kapitolyo ug misusi sa maong resolusyon.
Si Magpale mitug-an kang Gobernador Garcia nga ang hinungdan nga wala pirmahe ni Sanchez ang maong resolusyon kay nagduda diay kini nga gamiton sa gobernador sa pamolitika ang maong mga bugas alang sa barangay election karong sunod bulan.
Ang labaw nga opisyal sa NFA miangkon usab nga ang katuyoan sa maong MOA mao ang dali rang makakuha og bugas ang local government unit ilabina ang lalawigan ug ang kalungsoran sa higayon nga may kalamidad nga mahitabo sa kahilitang mga lugar.
Ang gobernadora sa iyang bahin mitumbok nga dili mahimong magamit ang maong bugas alang sa pamolitika sanglit para ra kini sa mga barangay o lungsod nga masugamak sa kalamidad. (BANAT NEWS)