CEBU, Philippines - Ang kabaho sa basura sa merkado publiko sa dakbayan sa Mandaue nga nakapalagot sa katawhan naggumikan sa ka walay trak sa basura sa merkado. Si Cesar Mercadal nga maoy officer-in-charge sa nahisgotang merkado mibutyag sa Banat News nga kun busy ang garbage truck sa barangay, dili gyud mahakot ang basura nga magtipun-og sa merkado nga naghatag og dakong hulga sa panglawas sa katawhan.
Ang merkado anaa ang nagkadaiyang baligya nga pagkaon, busa ang mga langaw ug lagong gikan sa maglaundok ug nangabaho na nga basura adto motugdon sa mga pagkaon ug delikado kaayo ang kinabuhi sa mga makakaon sa pagkaong gitugdonan sa mga lagong nga gikan sa basurahan.
Matud pa ni Mercadal nga nagkinahanglan gyud nga may kaugalingong trak sa basura ang merkado publiko aron nga dili mabara ug mangabaho ang basura sa maong lugar.
Hinuon giplano na ni Mayor Jonas Cortes nga matag usa sa 27 ka barangay palitan og tagsa ka trak sa basura.
Si Konsehal Benjamin Basiga nga maoy chairman sa committee on environment sa konseho miingon nga aprobado na nila ang gahin nga maoy gamiton alang sa pagpalit og trak sa basura sa kabarangayan.
Unya ang maong trak sa basura sa barangay Poblacion maoy gamiton sa paghakot sa mga basura nga magtipun-og 24 oras diha sa merkado publiko sa maong barangay. (BANATNEWS)