CEBU, Philippines - Ang presidente sa Association of Barangay Council (ABC) sa siyudad sa Sugbo Jingjing Faelnar mihagit sa kagamhanan sa siyudad sa Sugbo nga unahon ang iyang barangay sa pag-imbestigar kalabot sa giingong anomaliyang proyekto sa kabarangayan.
Matud pa ni Faelnar nga andam na siyang mopaimbestigar sa tanang mga proyekto nga gihatag sa kagamhanan sa siyudad sa panahon pa sa administrasyon ni kanhi mayor ug karon South District Congressman Tomas Osmeña.
Sigun sa report nga si Faelnar buot mopamatuod nga wala siyay kalambigitan sa gidudahang overprice o kaha substandard nga proyekto.
Ang maong pamahayag ni Faelnar gibuhian human migawas ang report nga si Osmeña mibahad nga iyang ipapriso ang mga barangay official bisan pa og kaalyado niya sila sa partidong Bando Osmeña Pundok Kauswagan (BOPK) kun matumbok sa imbestigasyon nga nagpaluyo sa overprice nga proyekto sa barangay o kaha migamit og mga substandard nga materyal.
Si Mayor Mike Rama sa iyang bahin mihatag og suporta sa baruganan ni Osmeña nga imbestigahon sa daling panahon ang mga anomaliya sa proyekto sa barangay ug ipabilanggo kun masakpang sad-an bisan pa og miyembro kini sa BOPK. – BANAT NEWS