CEBU, Philippines - Samdan ang usa ka sundawo dihang giluba kini sa usa ka sibilyan, apan napusilan usab niya angol ang suspetsado, atol sa piyesta didto sa sitio Upper Borbon, lungsod sa Aloguinsan sa miaging hapon.
Ang nalubaan mao si Pvt. First Class Rio Aniversario Lasap, 29, sakop sa 78th IB nga nagbase sa lungsod sa Aloguinsan, samtang ang nakadunggab kaniya nga si Enrique Alendajao, hingkod nga taga barangay Angilan, sa maong lungsod samdan usab sa tuong tiil sa usa ka bala.
Sumala sa kapolisan nga sa wala pa ang maong hitabo, may usa ka Diyenlo Cimafranca, nga taga Aloguinsan ra usab, nangutana kang Alendajao kung diin kini motago niadtong nangronda ang kapolisan didto sa barangay Angilan.
Matud pa ang maong pangutana nakapasuko kang Alendajao hinungdan nga gihansakan dayon sa kutsilyo niini si Cimafranca apan wala maigo ang naulahi.
Hinuon mikalma kini dihang nahiagi sila si Lasap ug mga kaubang sundawo kinsa miuwang usab dayon tali ni Alendajao ug Cimafranca.
Apan imbis mopatuo sa tambag ni Lasap, si Alendajao nga nagbitbit gihapon sa kutsilyo mihansak gyud niini ngadto sa sundawo ug maayo nalang kay maayo sa pangamot si Lasap, bukton ray nasamad niya.
Sa kabalaka tiwason siya ni Alendajao ,gipanalipdan ni Lasap ang iyang kaugalingon pinaagi sa pagpusil sa tuong tiil ni Alendajao.
Silang duha gihatod dayon ngadto sa Pinamungahan District Hospital. – BANAT NEWS