CEBU, Philippines - Mokabat sa 537 ka mga tinun-an ug mga magtutudlo sa pampublikong tulunghaan sa Central Visayas ang natakboyan sa sakit nga dengue, kini base sa natala sa Health and Nutrition Unit (HNU) sa Department of Education (DepEd-7).
Sumala pa sa rekord nga ang maong gidaghanon gikan lamang sa Agosto 11 hangtod sa Septiyembre 11 ning tuiga.
Sa natala nga mga biktima sa dengue sa HNU-DepEd-7 nga sagad sa gitakboyan og sakit mao ang mga tinun-an sa Grade III ngadto sa Grade IV.
Si DepEd-7 regional director Recarido Borgonia hugtanong mipadangat sa iyang mga pahimangno sa mga tagdumala sa nagkadaiyang tulunghaang publiko sa rehiyon 7.
Sa maong gidaghanon sa mga tunghaang pampubliko, ang dakbayan sa Sugbo gihapon maoy nag-una sa labing daghan sa biktima sa dengue hangtod niining panahona nga mokabat sa 159 ka mga tinun-an ug usa usab ka magtutudlo ang nalakip sa gitakboyan, 63 ka tinun-an sa Bohol, 30 ka tinun-an sa lalawigan ug 26 sa dakbayan sa Danao ug usa usab sa maong dakbayan ang gikataho nga labing ulahi nga namatay sa maong balatian. – BANAT NEWS