CEBU, Philippines - Gisugdan ni Kongresista Gabriel Luis “Luigi” Quisumbing ang pagtabang sa panginahanglanong medikal sa mga residente sa ika-unom nga distrito pinaagi sa pagbutang og pundo sa Vicente Sotto Memorial Medical Center.
Kagahapong adlawa, si Quisumbing mipirma og Memorandum of Agreement ngadto sa mga opisyal sa VSMMC nga nagbubo og P350 mil nga ayuda alang sa mga pasyente sa lungsod sa Cordova, Consolacion ug dakbayan sa Mandaue ilabi na sa mga nangasakit og dengue.
Matud pa ni Quisumbing nga ang maong pundo kuhaon gikan sa iyang Priority Development Assistance Fund (PDAF) nga gitagana alang sa medical services sa mga kabus nga mga pasyente sa ika-unom nga distrito pinaagi sa Department of Social Welfare and Development (DSWD-7).
Si Quisumbing nagkanayon nga ang maong kantidad pasiuna pa lamang kini tungod kay mao na lamang kini ang nahibiling mga gahin sa unang gipagawas nga PDAF sa termino pa ni kanhi Kongresista Nerissa Soon-Ruiz.
Giangkon ni Quisumbing nga dili kapaigo ang maong kantidad apan mipasalig siya nga sa higayon nga ma-release na ang ikaduhang hut-ong sa PDAF karong Oktobre, iya pa kining padak-an.
Dugang pa niya nga ang gidak-on sa tabang nga ihatag sa pasyente magdepende sa assessment ug evaluation sa DSWD personnel ngadto sa kahimtang sa pasyente.
Kauban ni Quisumbing sa pagpirma sa maong MOA mao ang medical director sa VSMMC nga si Dr. Gerardo Aquino ug ang direktor sa DSWD-7 nga si Ma. Evelyn Macapobre. – BANAT NEWS