CEBU, Philippines - Usa ka kontraktor mipasaka og kaso sa Office of the Ombudsman-Visayas batok sa igsuon ni Gob. Gwendolyn Garcia nga si Bise Mayor Marlon Garcia sa Barili tungod sa kapakyas niini pagbayad sa iyang utang nga mokabat og P200 mil.
Ang kontraktor nga si Ike Maglasang, molupyo sa barangay Pitogo, lungsod sa Consolacion miduso sa iyang duha ka pahina nga reklamo sa Ombudsman Visayas batok kang Garcia kagahapon sa alas 9:25 sa buntag.
Gisukip sa reklamo ni Maglasang ang dokumento nga gipirmahan niya ug ni Garcia paggamit og kwarta sulod sa duha ka higayon niadtong wala pa kini mapili pagka-bise mayor diin ang una niadtong Disyembre 4, 2008 sa kantidad nga P150 mil ug gisundan og laing P50 mil sa pagka Disyembre 23, 2008.
Gibutyag ni Maglasang sa dihang nahinabi sa Banat News sa telepono nga napugos siya pagpasaka og reklamo batok sa bise mayor human nagdumili pagbayad sa iyang obligasyon sa dihang iyang paninglon ug igo lang siyang tubagon nga pakihaon lang. Dugang ni Maglasang nga nagpagamit siya og kwarta kang Garcia tungod kay misalig siya tungod sa ilang pagkasuod nga higala ug classmate sa elementarya ngadto sa high school sa University of San Carlos (USC).
Matud niya mihangyo niya si Garcia nga mogamit og kwarta tungod kay iyang gamiton pagpapili pagka-bise mayor sa nag-inangat nga eleksyon niadtong Mayo 10.
Samtang si Garcia sa dihang nahinabi sa Banat News pinaagi sa telepono mihulagway sa kiha nga usa ka political harassment gumikan kay matud niya na-settle na niya ang maong obligasyon kaniadto pa ug naglibog siya kun nganong gibalik na usab kini karon.
Iyang giangkon nga suod silang managhigala ni Maglasang ug duna silay business transaction sa milabay’ng katuigan.
Gihulagway niya ang tanang nanggawas nga reklamo batok niya nga tipik ug kabahin sa hugaw nga pamolitika sa lungsod nga gustong modaot kaniya.
Nasayran nga nagkasungi karong bag-o ang bise mayor ug si Mayor Teresito Marinyas ug gani una nang gipasakaan og reklamo sa Ombudsman si Garcia sa usa ka pundok nga Visayan Anti-Graft nga nagbase sa maong lungsod sa milabay’ng semana tungod sa pasangil nga paghari-hari sa bise mayor atol sa milabay’ng sesyon ug nangasaba sa mayor nga ni-set in sa konseho.
Matud ni Garcia nga paabuton niya nga makadawat og kopya sa reklamo una mohatag og dugang tubag niini. – BANAT NEWS