CEBU, Philippines - Duha ka tawo ang nangaangol human ang ilang gisakyang trak nga nagkarga og mga tangke sa acetylene ug oxygen ang nalimbuwad kagahapon sa buntag diha sa Cebu South Coastal Road habig sa sitio San Rafael, barangay Tanke, dakbayan sa Talisay.
Ang mga naangol mao si Julius Ornopia, 33, taga barangay Casuntingan, dakbayan sa Mandaue, drayber sa truck ug ang iyang truck boy nga si Pablo Veraces, 54, taga barangay Canduman Mandaue. Si PO2 Amelito Hornales sa Talisay City Traffic Division sa pakighinabi niini sa Banat News kagahapon nagkanayon nga ang maong trak gipanag-iya sa CP Gas supplier og mga oxygen ug acetylene. Si Ornopia nagbiyahe gikan sa ilang main office sa dakbayan sa Mandaue paingon sa branch office nila ngadto sa lungsod sa Minglanilla.
Matud ni Hornales nga kusog ang pagpadagan ni Ornopia tungod kay hawan ang karsada apan pag-abot diha sa nahitaboan usa ka motorsiklo ang mitupad kanila diha sa walang bahin ug mikalit lang og overtake ug miali sa ilang atubangan.
Tungod niini gikabig ni Ornopia ang manobela dungan sa pagtunob sa brake aron paglikay sa maong motorsiklo hinungdan nga nalimbuwad hinuon ang ilang trak. Si Hornales nagkanayon nga niadtong higayona 75 ka mga tanke sa oxygen ug acetylene ang karga sa trak ang mikaliring ug nagpasad sa dalan samtang si Ornopia natanggong sa sulod apan ang truckboy niini nahagbong sa trak.
Ang mga sakop sa Emergency Rescue Unit Foundation (ERUF) mao nay mihulbot kang Ornopia ug gidala ang duha ngadto sa Chong Hua Hospital. (BANAT NEWS)