CEBU, Philippines - Duha ka tuig nga batang babaye maoy ulahing namatay tungod sa dengue sa dakbayan sa Talisay.
Si Jessa Alquizar, taga sitio Tabay, barangay Pooc namatay niadtong Biyernes human sa upat ka adlaw nga pagka-hospital niini sa Vicente Sotto Memorial Medical Center.
Ang maong bata maoy natalang ika-lima nga namatay sa Talisay gumikan sa sakit nga dengue niining tuiga. Si Osmundo Manreal Jr. presidente sa Association of Barangay Captains (ABC) ug kapitan sa barangay Pooc mibutyag nga si Alquizar maoy unang namatay sa dengue sa ilang barangay karong tuiga.
Base sa talaan sa Talisay City Health Office mikabat na sa 196 ang kaso sa dengue sa siyudad gikan niadtong Enero niining tuiga hangtud niining buwana, Septembre.
Sa laing bahin, si Manreal nagkanayon nga ang iyang mabasol sa maong hitabo mao ang mga napundong tubig sa mga kanal sa iyang barangay tungod sa kakuwang sa imbornal.
Niadtong milabay’ng buwan ang compound sa Pooc Elementary School lakip na ang mga lawak saringan ug ang mga silingang lugar gisanapan sa tubig tungod sa sunod-sunod nga pagbundak sa uwan.
Ang ubang parti sa iyang barangay gitumbok sa city planning and development office nga flood-prone area ug migrabe ang sitwasyon tungod kay walay klarong kanal. (BANAT NEWS)