CEBU, Philippines - Gipatay sa kaugalingong apohan ang iyang apo nga palahubog nga nanghagis sa ilang pinuy-anan tungod sa tumang kahubog didto sa barangay Tomonoy ,lungsod sa Moalboal niadtong Biyernes sa alas 10:30 sa buntag.
Ang biktima mao si Randy Superable Gabutero, 29, ulitawo, molupyo sa nahisgutang lugar, samtang ang suspek mao si Sulficio Gabutero Erena, 75 , biyudo nga apohan sa biktima.
Si PO2 Benidecto Rubia sa Moalboal Police Station mibutyag sa Banat News nga ang biktima kinsa hubog kaayo ug dihang miabot sa balay sa apohan gipangkay-ag ang tanang mga butang sa sulod sa balay.
Matud pa gibadlong kini sa suspek apan misamot hinuon sa paghiwasa ug pagpanghagis ug gani buot untang kulatahon niini ang iyang apohan.
Ang suspek kinsa nabalaka nga siyay patyon sa biktima, milanit sa iyang pinute ug dihang midasmag kaniya ang biktima gihansakan niya kini og kalit sa pinute hinungdan nga maayong pagkatuhog sa pinute sa tiyan sa biktima.
Ang biktima gihatod dayon ngadto sa Badian District Hospital apan paglabay sa pipila ka gutlo nabugtoan kini sa kinabuhi tungod kay nahutdan sa dugo.
Samtang ang suspek boluntaryong mitahan usab ngadto sa kapolisan ug sa pagkakaron nagtingkagol na kini sa karsel samtang nagpaabot sa tukmang sumbong nga ipasaka batok niya.
Dugang gibutyag sa suspek ngadto sa mga polis nga ang biktima kanunay gyud nga mo-andar ug manghagis sa ilang balay sa higayon nga mopauli kini nga hubog. (BANAT NEWS)