CEBU, Philippines - Ang Department of Energy (DOE) miawhag sa mga negosyante nga may mga balay patigayon ug mga ahensya sa gobyerno sa pagdaginot sa enerhiya aron nga malikayan ang kanunay nga pag-brown out.
Si Jesus Anunciacion, OIC ug Assistant Director sa Energy Utility Management Board (EUMB) sa DOE miingon nga naglaraw sila sa pagduso og usa ka balaodnon sa kongreso kalabot niini.
Ang maong bill tawgong Energy Commission Bill (ENERCOM) kansang tumong mao ang pagsagop sa sistemang gipatuman sa kagamhanan sa Hapon kalabot sa dinaginot nga paggamit sa enerhiya.
Midugang si Anunciacion nga sa pagkakaron ang maong bill nagpabilin pang draft apan usa sa mga unod niini mao ang mga silot unya sa mga balay patigayon ug mga ahensya sa kagamhanan nga makalapas sa balaod.
Ang maong balaodnon nga giuyonan usab sa Japan International Cooperation Agency (JICA) mosang-at og mga kasong kriminal sa mga malapason. - BANAT NEWS