CEBU, Philippines - Kritikal ang kondisyon sa usa ka 38-anyos nga lalaki human kini pusila sa usa ka giingong ex-convict niadtong Huwebes sa gabii didto sa sitio Isla Puwa, barangay San Isidro, dakbayan sa Talisay.
Ang biktima mao si Fernando Gallego, nga taga San Isidro, samtang ang suspetsado mao usab si Jose Yares alyas “Joe Bulhog”, hingkod ug silingan sa biktima.
Si PO3 Mikie Espina sa Talisay City Police Office kinsa usa sa mga miresponde sa maong hitabo sa pakighinabi sa Banat News kagahapon mibutyag nga base sa ilang nahipos nga report si Yares giingong usa ka ex-convict ug maldito diha sa ilang lugar.
Si Yares ug Gallego dugay-dugay nang nagkabangi gumikan sa personal nga hinungdan.
Si Gallego giingong naglakaw sa karsada paingon na untang mopauli apan giingong giatangan siya ni Yares ug gipusil nga walay daghang langas.
Nasabak sa ibabaw nga bahin sa tuo niyang kilay ug ang bala miungot dapit sa tingkoy kay wala kini makalapos.
Daling gihatod ang biktima ngadto sa Talisay District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Napunit sa kapolisan sa lugar nga nahitaboan mao ang usa ka .38 kalibre nga revolver nga dunay lima ka kabhang sa bala ang tambor niini.
Si Espina midugang nga nagpahigayon sila og follow-up nga imbestigasyon sa hitabo sa pagkakaron. - BANAT NEWS