CEBU, Philippines - Usa ka miyembro sa militanteng Bayan Muna nga giingong na-missing ug gidudahang gisignit duha na ka adlaw ang nakalabay ang naluwas sa mga sakop sa Alcoy Police Station kagahapon sa buntag.
Ang maong lalaki giilang si Elke-Ray Bacalso, 22, tinun-an sa 3rd year sa kolehiyo sa Cebu Institute of Technology nga nagkuha og kursong Bachelor of Science in Education.
Sumala pa sa gipadalang mensahe ni Sr. Supt. Erson Digal dinhi sa Banat News si Bacalso gisignit niadtong Septembre 8, sa dakbayan sa Sugbo.
Si SPO3 Lazaro Saquilabon sa Punta Prinsesa Police Station sa pakighinabi sa Banat News mibutyag nga ang igsuong babaye ni Bacalso nga si Vera Dumol mipa-blotter sa manghod nga missing.
Giingong milakaw si Bacalso gikan sa ilang balay diha sa Pardo aron motungha sa CIT apan wala na kini makauli pa. Wala pay detalye ang kapolisan kun giunsa pagkahitabo nga naabot sa Alcoy si Bacalso.
Kagahapon, gikatahong nakadawat og tawag pinaagi sa cellphone ang kabanay ni Bacalso nga ‘buhian’ siya sa mga tawong midala kaniya diha sa barangay Poblacion sa lungsod sa Alcoy. Si SPO1 Elizer Tando sa Alcoy Police Station mibutyag sa Banat News nga wala silay nakit-ang laing kauban si Bacalso atol sa pagkaluwas kaniya.
Sumala pang Tando, si Bacalso gipahatud unta sa usa ka kolor blue nga multicab padulong sa barangay Poblacion apan na-flat ang ligid niini ug gipabalhin siya sa mga wala mailhing lalaki sa usa ka pasaheroang traysikol ug gipapahatod sa lungsod.
Wala makakuha og dugang impormasyon ang kapolisan sa Alcoy gumikan kay nagdumili sa pagbutyag si Bacalso. Lakip sa miadto sa maong lungsod mao si Armand Perez sa Bayan Muna ug si Fe Marie Arcillas sa Karapatan.
Si Digal mibutyag nga mapasalamaton si Perez sa pagkaluwas sa ilang miyembro. Samtang aduna pay himuong imbestigasyon kabahin sa maong kaso. – BANAT NEWS