CEBU, Philippines - Gipasidunggan kagahapon sa buntag sa Kapitolyo ang upat ka grade three pupils sa Malhiao Elementary School sa lungsod sa Badian nga miuli sa P50 mil nga tinulis gikan sa usa ka spa sa dakbayan sa Lapulapu.
Sila si Kathlene Taypin, Gail Aimyh Velos, Jareann Sasing ug Nanette Taboeda, inubanan sa ilang mga ginikanan, kapitan ug mayor sa Badian, gitunolan sa pasidungog ni Gob. Gwendolyn Garcia.
Gitunol nga pasidungog ang usa ka sakong bugas, usa ka karton nga sardinas, usa ka karton nga noodles, gamit sa eskwelahan sama sa notebook, papel, sapatos, medyas ug uniform ug gilakipan og P10,000.
Si Garcia midayeg sa mga bata nga iyang gihulagway nga mga bayani nga nakahatag og dungog sa mga Sugbuanon.
Nanghinaot kini nga sundon sa ubang kabataan ang kamatinud-anon sa upat ka mga bata. Ang mga ginikanan mipadayag usab sa kalipay sa pasidungog nga nadawat sa ilang mga anak. Si Jocelyn Sasing, inahan sa usa ka tinun-an, miasoy nga malipayon kaayo siya sa gibuhat sa iyang anak kay gituman niini ang iyang mga gipanudlo.
Matud usab ni Kathlene Taypin, ang batang nakakita sa maong salapi nga nalipay siya sa gihatag nga pasidungog alang kanila.
Dugang pa niya nga nahadlok siya sa iyang pagkakita sa maong salapi kay daghan man kini busa gitawag niya iyang mga suod nga higala ug gihatag nila kini sa ilang adviser nga si Teresita Cordero.
Si Mayor Robburt Librando sa Badian miingon nga hatagan usab nila og pasidungog ang mga bata sama sa school supplies ug commendation gikan sa Sangguniang Bayan.
Si Librando usab mohatag og upat ka sapatos. Samtang si Kapitan Floro Raboy mohatag og upat ka medyas. (BANATNEWS)