CEBU, Philippines - Patay ang usa ka mag-uuma human kini giunay sa pagdunggab sa iyang umagad pasado alas 7 sa miaging gabii sa barangay Bae, lungsod sa Sibonga.
Ang biktima nailhan nga si Cristino Oplimo, 35, molupyo sa maong lugar. Nakaangkon kini og samad dinuslakan sa kilid nga bahin sa iyang lawas.
Samtang ang suspetsado nailhan nga si Bienvinido Villafranca, 60, molupyo usab sa maong lugar kinsa boluntaryong mitahan sa iyang kaugalingon ngadto sa kapitan. Sa pakighinabi sa Banat News ni PO2 Ederlino Bacusmo mibutyag kini nga ang biktima ug ang suspetsado nagkalingaw og inom-inom sa gawas sa ilang panimalay.
Apan taliwala sa ilang panag-inom, nakahisgot sila kalabot sa yuta nga miresulta sa pananglalis ug kalit lang giyab-an og noodles sa biktima ang suspetsado nga maoy gikasuko niini.
Sa walay pagduhaduha mideretso og kuha og sundang ang suspetsado ug gideretso’g hansak ngadto sa biktima. Daling gidala ang biktima sa Carcar City District Hospital apan gideklarar kini nga dead on arrival.
Samtang ang suspetsado milahos sa panimalay ni Kapitan Constancio Padigos sa barangay Bae aron boluntaryong motahan sa iyang kaugalingon ug gihatod usab sa kapitan ang suspetsado sa buhatan sa Sibonga Police Station.
Matud pa ni Bacusmo nga ang anak sa suspetsado nga babaye maoy bana sa biktima apan daw giingong nadala lang sa kahubog ang nahitabo.
Midugang si Bacusmo nga kasong Homicide maoy ipasaka batok sa suspetsado. (BANATNEWS)