CEBU, Philippines - Usa ka gidudahang gun runner nga nangompra og ubay-ubay’ng mga paltik nga armas gikan sa dakbayan sa Danao nasikop samtang paingon na untang mosakay og barko paingon sa Escalante, Negros Occidental ug lahos ngadto sa iyang lungsod sa Pasa, Ilo-Ilo.
Nasikop ang giingong gun runner nga nagbitbit og traveling bag nga gisudlan sa siyam ka nagkadaiyang armas nga walay lisensya sa miaging gabii sa Tabuelan Wharf, lungsod sa Tabuelan.
Ang nasikop nailhan nga si Rodolfo Montejo, hingkod ang panuigon ug lumad nga taga Pasa, dakbayan sa Ilo-Ilo.
Si Sr. Insp. Florendo Fajardo, hepe sa Tabuelan Police Station miasoy nga si Montejo natiktikan sa mga impormante samtang nagdaladala og traveling bag sa dakbayan sa Danao.
Sumala pa nga usa ka residente sa Danao miasoy sa iyang higala sa Tabuelan kinsa usa ka sakop sa militar, kalabot sa panglihoklihok ni Montejo. Ang sundalo na maoy mipahibalo sa Tabuelan Police Station ug nagsilbe kining ‘spotter’.
Tulo ka mga polis, uban sa sundalo isip testigos, midakop kang Montejo sa Tabuelan wharf pasado alas 9 samtang mopaingon na unta kining mosakay og ro-ro paingon sa Escalante diin adto usab siya mosakay og bus palabang paingon sa Ilo-Ilo.
Si Montejo kinsa miangkon nga siya’y nagdala sa maong mga armas mipresentar sa kapolisan og license card sa pagpanag-iya og armas sa dihang giawhag pagpaila.
Nagdumili hinuon sa pagtug-an si Montejo kang kinsa niya napalit sa Danao ang maong mga armas ug kinsay iyang baligyaan didto sa Ilo-Ilo.
Nakuhaan si Montejo og duha ka kalibre .45, tulo ka kalibre .38, duha ka kalibre .357, usa ka shotgun ug usa ka 9mm Ingram.
“Among pagtuo dugay na ni niyang ginabuhat ang pagpalit og armas nya karon lang masakpi. Wala man gud X-ray machine sa Tabuelan wharf,” sumala pa ni Sr. Insp. Fajardo.
Ang mga armas, sumala pa sa hepe, gikustodiya sa iyang buhatan samtang nagpaabot nga iduso ngadto sa Firearms, Explosives, Security Agencies and Guards Supervision Section (FESSAGS). (BANATNEWS)