CEBU, Philippines - Nahinugon ang mga transport groups dinhi sa Sugbu kabahin sa gipagawas nga kamanduan sa Korte Suprema nga iuli sa mga motorista ug sa mga operators sa mga sakyanan nga nakabayad na sa Radio Frequency Identification Device (RFID) nga gipamutang sa mga sakyanan lukop nasud.
Si Ryan Yu, director sa Citrasco dinhi sa tunga-tungang kabisay-an mipadayag nga ang RFID mahinungdanon kaayo alang nilang mga operators tungod kay pinaagi niini ang mga sakyanan mahibaw-an gyud kun ‘kolorum.’
Matud pa ni Yu nga wala na silay mahimo pa batok niining mga kolorum nga mga taxi nga nagdagan nga walay klarong dokumento gikan sa Land Transportation Franchising and Regulatory Board (LTFRB)-7 tungod sa maong kamandoan.
Sumala pa niini nga kun gihatagan palang unta og kahigayonan nga mapatuman ang RFID makita unta sa katawhan ingon man sa mga opisyal sa gobiyerno lakip na ang korte kun unsa ka mahinungdanon ang maong programa nga gisugdan na unta sa pagpatuman.
Si Yu miingon nga hapit na katunga sa ilang mga miyembro sa Citrasco ang nakabayad na sa RFID ngadto sa buhatan sa Land Transportation Office (LTO)-7.
Ang RFID usa ka modernong pamaagi sa pagsusi sa usa ka nagdagan nga sakyanan diha sa kadalanan kun si kinsa ang mga tag-iya, orihinal nga kolor, plaka ug uban pang kasayuran kabahin sa usa ka sakyanan nga gikwestyon pinaagi lamang sa sticker nga ipapilit diha sa ilang mga windshield nga mabasa gamit ang usa ka ekipo.
Apan daghan ang misupak niini ilabi na sa mga pribadong sektor ug pipila ka mga transport groups tungod kay giingong nakalapas kini sa ‘privacy’ sa tag-iya sa sakyanan. (BANATNEWS)