CEBU, Philippines - Nabalaka ang kagamhanan sa lalawigan sa Sugbu sa resulta tungod sa kapungot ug kalagot sa mga taga Hong Kong ngadto sa mga Filipino ug maapektahan unya ang ilang pagpanarbaho sa maong nasud.
Si Gob. Gwendolyn Garcia mipadayag nga tungod sa pagkamatay sa walo ka mga turistang intsik sa nahitabong hostage taking sa Quirino Grandstand sa Rizal Park sa Manila nabalaka siyang panimaslan ang mga Overseas Filipino Workers sa Hongkong.
Kini tungod kay daghan usab ang mga Sugbuanong mga OFWs sa Hongkong ug gani sigun sa mga report aduna nay duha ka mga OFW nga gitaktak sa ilang mga trabaho gumikan sa kapungot sa ilang employer sa nahitabo sa Manila.
Matud sa tigpamaba sa Kapitolyo nga si Rory Jon Sepulveda, ubay-ubay na sa iyang mga kaila nga atoa karon sa Hongkong ang mipadayag og kahadlok sa ilang pagpuyo ug pagtrabaho didto sa maong dapit.
Sumala pa niini nga aduna nay mga Filipino nga dili na magsul-ob og sapot nga daling mag-ila kanilang sila mga Filipino nga kaniadto sagad nilang himuon aron pagpasigarbong sila mga taga Pilipinas.
Si Sepulveda miingon nga ang labing dako niyang gikagul-an ang adlaw’ng Domingo diin sagad maoy day-off sa mga OFW ug sagad mag-abot sa usa ka dapit sa Hongkong aron magkahimamatay.
Particular na niini ang Hong Kong Times Square nga maoy sagad abutanan sa mga OFWs ug gikabalak-an ni Sepulveda nga panimaslan sila tungod sa nahitabong pagpang-hostage ni kanhi Sr. Insp. Rolando Mendoza ug kapalpakan sa kapolisan pagpakgang niini.
Samtang nadawat na ni Garcia ang rekomendasyon ni Cebu Provincial Police Director Erson Digal nga mga sakop sa Federal Bureau of Investigation maoy buot nilang mobansay sa Special Reaction Unit ug dili ang lokal nga Special Weapons and Tactics. (BANAT NEWS)