CEBU, Philippines - Bisan paman sa kabati sa nahimong imahe sa na-dismiss nga polis nga si Sr. Insp. Rolando Mendoza nga nang-hostage og mga turistang taga Hongkong gidugok gihapon sa mga tawo ang lubong niini kagahapon diha sa iyang yutang natawhan.
Sa report sa ABS-CBN News, gatusang mga tawo ang mibutho ug mihatud sa lubong ni Mendoza nga naglangkob sa iyang mga kabanay, kahigalaan agi pagpakita sa ilang pagtamod sa mga maayo niining nabuhat sa dihang anaa pa kini sa serbisyo isip sakop sa kapolisan.
Gilubong si Mendoza nga walay Bandila sa Pilipinas, walay 21-gun salute ug uban pang seremonyas nga himuon atol sa lubong sa usa ka polis.
“There are so many mourners because he was a good man. You never heard about him doing anything bad," sumala pa sa usa ka bodegerong si Mark Torres, nga higala sa pamilyang Mendoza.
Diha sa balay diin kini gihaya, gipangsab-it sa pamilya ni Mendoza ang tanang mga medalya nga nadawat niini samtang nagserbisyo pa kini sa kapolisan. Nasuta usab nga bisan na ang mga kaubanan niini sa kapolisan mipadala usab og mga buwak.
Una nang mipadayag og kasagmuyo ang Chinese embassy pagkakita sa tv footage nga adunay Bandila sa Nasud ibabaw sa lungon ni Mendoza butang nga gihulagway usab sa Department of Foreign Affairs nga wala magsunod sa patakaran gumikan kay na-dismiss naman sa serbisyo si Mendoza.
Si Mendoza nataktak sa pagkapolis gumikan sa kasong extortion, robbery-extortion ug uban pa hinungdan nga nang-hostage kini sa 25 ka mga tawo lakip na ang 22 ka turistang taga Hongkong sulod sa usa ka tourist bus. Napalpak ang negosasyon sa kapolisan ug miresulta sa kamatayon sa walo ka turista ug ni Mendoza butang nga gisaway sa Hongkong ug gobiyerno sa China. EIM (BANAT NEWS)