CEBU, Philippines - Hatagan og ‘disciplinary action’ ang warden sa Cebu Provincial Detention and Rehabilitation Center (CPDRC) tungod sa pagpamakak kabahin sa nahitabong pagpangulata sa mga inmates nga miresulta sa kamatayon sa usa samtang na-hospital ang laing piniriso.
Kini usa sa mga rekomendasyon sa pagkahuman sa imbestigasyon sa komitiba nga giumol ni Gob. Gwendolyn Garcia labot sa nahitabong pagkamatay sa duha ka mga inmates Suma pa ni Atty. Lito Astillero ang pangulo sa Committee on Investigation and Discipline nga ang ilang pito ka mga rekomendasyon giaprobahan dayon sa gobernador.
Gani mipagawas dayon og duha ka memorandum si Garcia pinaagi ni Provincial Administrator Eduardo Habin aron pag-imbestigar kang Warden Alito Gabuya ug pagpatuman sa iyang rekomendasyon sa komitiba.
Matud pa ni Astillero nga ang disciplinary action kang Gabuya bunga sa pagtago niini sa tinuoray nga nahitabo gumikan kay kini nangangkong natagak ra sa bangko si Cabalquintos apan nasutang gikulata kini uban sa laing piniriso nga si Benjie Undit tungod sa tinguha sa pagpatay sa kauban niining piniriso ug dili tungod sa pagdumili niini sa pagsayaw.
Ang laing rekomendasyon mao ang pagpahugot sa seguridad, paghingusog sa random roving, random inspection sa tanang selda, hugtan ang inspeksyon sa mga bisita ug paghatag og legal assistance sa pamilya ni Cabalquinto ug Undit kun mopasaka kini og legal nga kaso batok sa 16 ka mga inmates nga maoy mibun-og kanila.
Dugang pa ni Astillero nga karon sunod semana magsugod na ang ilang formal investigation ug hatagan nila og kahigayonan nga makahatag sa iyang habig ang warden samtang ila pang tun-an kun kinahanglan kini ipaubos sa preventive suspension. – BANAT NEWS