CEBU, Philippines - Tulo ka tawo ang nadakpan sa kapolisan sa nagkalainlaing dapit ning dakbayan sa Sugbo atol sa buy bust operation nga ilang gilusad sa miaging adlaw.
Ang nadakpan didto sa Alviola Street, sitio Villagonzalo 2, barangay Tejero mao si Arnold Flores, 47, uban sa tulo ka paketeng shabu.
Matud pa ni SPO1 Vicente Espinido sa Cebu City Police Office nga wala kaugpo si Flores dihang nasakpan nila kini sa akto nga naghupot sa mga pinutos nga shabu. Samtang didto sa Punta Princesa ang nadakpan mao ang magtiayong Vivencio Baldesamo, 40, ug ang asawa niining si Josephine Baldesamo, 38.
Ang magtiayon sumala pa ni SPO2 Crisente Dacilio, daan nang naluwatan og warrant of arrest kalabot sa pagpamaligya og ginadiling drugas apan gumikan sa kaidlas wala nila kini madakpi sulod na sa pipila ka buwan. Apan samtang gironda sa kapolisan ang nagtigbakay sa Punta Princesa, namay-ongan nila ang magtiayong dugay na nilang gipangita.
Nahibilin kini sa tigbakayan dihang nagtibuag og panagan ang mga sugarol dihang gisunggaw sila sa kapolisan.
Dihadiha gisikop dayon ang magtiayon ug anaa na kini karon sa kustodiya sa kapolisan. (BANATNEWS)