CEBU, Philippines - Usa ka lolo ang gipasakaan og kaso diha sa Provincial Prosecutors Office tungod sa pasangil nga paglugos niini sa apo sa unang pamilya sa iyang asawa.
Ang gipasakaan og kasong pagpanglugos sa kapolisan sa dakbayan sa Talisay mao ang usa ka Jerry (apelyedo gipugngan), 48, nagpuyo sa usa sa mga barangay sa siyudad sa Talisay human positibong gitumbok sa kapolisan nga milugos sa usa ka minor de edad nga apong babaye didto sa panimalay niini niadtong adlaw nga Huwebes petsa-19 sa Agosto ning tuiga.
Sumala pa sa usa ka polis nga uyoan sa biktima ang biktima nanawag sa Talisay City Police Office pagpangayo og tabang.
Dihang naabot ang kapolisan sa balay nga gipuy-an sa biktima nasakpan pa sa akto ang suspetsado nga nagpahimulos sa biktima hinungdan nga gidakop kini dayon.
Ang bata gihatud dayon ngadto sa city social welfare officer sa Talisay. Ang suspetsado kusganong mihimakak sa maong pasangil ug mitumbok sa maong pasangil batok kaniya nga usa lamang ka tumotumo sa mga anak sa unang bana sa iyang asawa kay buot sila nilang magkabuwag.
Ang Provincial Prosecutors Office mopahigayon pa og inquest investigation sa maong kaso kun iduso dayon kini ngadto sa korte ang kasong pagpanglugos batok sa suspetsado. (BANATNEWS)