CEBU, Philippines - Buksan na sulod sa 24 oras ang tunnel sa South Road Properties (SRP) sugod karong adlawa.
Apan matud pa ni Mayor Michael Rama nga mga gagmay rang behikulo ang tugotang makaagi sa maong tunnel nga nagsubay ilawom sa Plaza Independencia.
Matud pa ni Rama nga dako kaayo og ikatabang ang maong tunnel aron mokibra na ang problema sa trapiko sa dakbayan.
Nasayran nga tun-an pa sa task force nga gi-umol sa Cebu City Council kun angay bang tugotan o dili nga makaagi sa maong tunnel ang mga motorsiklo ug mga dagkong truck .
Ang maong task force naglangkob sa mga representante gikan sa Kajima Corporation , City Fire Department, Cebu City Traffic Operations Management (Citom), ug Department of Public Works and Highways-7 .
Samtang gibutyag usab ni Ronie Nadera , base control operator sa City Traffic Operations and Management (CITOM) nga ang tahas sa task force mao ang dinaliang paghimo og action kun dunay mga bangga nga mahitabo.
Ang maong agianan dunay sukod nga himabaw sa kilometro uban sa upat ka lane nga karsada ug gasto nga mikabat sa P1.625-billion. (BANATNEWS)