CEBU, Philippines - Si 4th district Congressman Benhur Salimbangon maninguhang magkauliay sila si Gob. Gwendolyn Garcia ug Daanbantayan mayor Maria Luisa Loot sa ilang panagbangi ning nakalabay’ng mga adlaw.
Matud pa ni Salimbangon nga parehong sakop sa One Cebu Party ang duha diin si Garcia maoy pangulo, sanglit pareho silang magkaalyado sa politika.
Si Salimbangon nihulagway sa maong panag-away ni Garcia ug Loot nga sama ra og away sa mga miyembro sa pamilya ug dili malikayan ang panagsungi apan mahimo ra kining ulion.
Matud pa ni Salimbangon nga walay siya’y gidapigan sa duha apan miangkong maabtan pa og taas nga panahon una ang duha magkauliay sa maayong kabubut-on niini.
Mopatabang si Salimbangon sa ubang miyembro ug opisyal sa ilang partido aron hiloton ang kasungian sa duha.
Apan ang higpit nga kaatbang ni Salimbangon nga si Bogo City mayor Celestino Junie Martinez Jr. nagtuong dili magbuwag ang duha tungod kay taas na kaayong panahon ang duha nagkauban. (BANAT)