CEBU, Philippines - Nasikop ang duha ka babaye uban sa tulo ka paketeng shabu atol sa buy bust operation nga gilusad sa kapolisan sa ilang pinuy-anan didto sa barangay Obo, lungsod sa Dalaguete, sa miaging adlaw.
Ang mga suspetsado giila sa kapolisan nga sila si Emilia Ensila, 28, ug Estrellita Villa, 29, pulos dalaga nga taga Obo. Gawas sa tulo ka paketeng shabu, nasakmit usab sa kapolisan gikan sa mga suspetsado ang usa ka cellular phone nga gituohang gigamit sa ilang illegal nga pamatigayon, uban sa marked money nga gihimong paon sa kapolisan.
Nasayran gikan sa kapolisan nga dugay na nilang gipanid-an ang illegal nga pamatigayon sa mga suspetsado.
Dihang nasuta nila ang tanan, dihadiha, usa ka polis nga nagpakaaron ingnong buyer og shabu maoy nagdala sa minarkahang salapi aron konuhay ibayad, ug dihang gitunol sa mga suspetsado ang tulo ka paketeng shabu, dihadiha giposasan dayon sila.
Mikagulkol na karon sa prisohan ang maong mga suspetsado samtang giandam na sa kapolisan ang tukmang kaso nga isang-at batok kanila. (BANAT)