CEBU, Philippines - Si Senador Loren Legarda maoy usa sa pinasidunggang dinapit atol sa labing gipabongga nga Siloy Festival (SF) didto sa lungsod sa Alcoy karong Agosto 28, 2010 nga gigahinan og P1.4 milyones .
Si Mayor Nicomedes “Nick” delos Santos mibutyag sa Banat News nga mas higpit ang kompetisyon sa SF karong tuiga tungod kay gipangandaman nila kini aron paglangkat sa korona sa kampiyon sa Pasigarbo sa Sugbo (PS) nga pasiugdahan sa Kapitolyo karong sunod tuig.
Mahinumdoman nga ang Palawod Festival (PF) sa isla sa Bantayan maoy kampiyon sa bag-o lang natapos nga PS nga gipahigayon didto sa Cebu International Convention Center (CICC).Matud ni mayor delos Santos nga gilimitahan lang nila ngadto sa lima ka contingent ang SF karong tuiga nga gilangkoban sa Nug-as Elementary and High School, Barangay Pasol-Pugalo, Poblacion Elementary School, Poblacion National High School ug Guiwang Elementary School.Mokabat sa P50 mil ang ganti alang sa mogawas nga kampiyon ug P40 mil sa ikaduhang ganti ug P30 mil alang sa 3rd placer.Gawas kang senador Legarda gipaabot usab nga motambong si kongresista Pablo Garcia sa segundo distrito ug ubang opisyal sa lalawigan sa Sugbo gawas lang ni Gobernador Gwen Garcia nga wala pay klaro kun makatambong ba sa maong kalihokan.Ang SF nahimong popular human kini makadaog niadtong milabay’ng Sinulog Mardigras dinhi sa dakbayan sa Sugbo pipila na ka tuig ang milabay ug duha ka higayong nakasulod sa top 5 sa PS sa milabay’ng duha ka tuig.Midugang ang mayor nga daku kaayo og natampo ang maong festival nga gitumong sa pagpalambo sa turismo sa lungsod sa Alcoy uban sa pagpreserbar sa langgam nga siloy nga nagkahilis na og hapit na mapuo sa hingpit apan sa pagkakaron anha ra kini mapalgan sa Alcoy. (BANAT)